ازيكم وحشنى والله عاملين ايه كل سنة وانتم طيبين وبخروف العيد مبسوطين يا سلام واخدين بالكم خروف العيد انا عارفه ان كلكم عوزين تخبوه عشان متدنيش حته ماشى الله يسامحكم انا هقولكم على طريقة سهله جدا جدا فى توضيب البيت قبل العيد لانى عرفه هم البيت والتنضيف وخصوصا فى العيد
اولا:- شيلى فرش الارضيه وحطيه فى البلاكونه فى الشمس عشان تخرج الميكروبات عملتيها شاطرة
ثانيا:- نضفى الحيطان بالزعافه والاركان والسقف لا برافوا عليكى
ثالثا:- نفضى الاجهزة والموبيليات والترابيزات واى حاجه فى البيت بقماشه نشفه وبعدين تجيبى منظف الزجاج وتعملى بيه المريات والموبيليا بس الزجاج ميتمسحش بالقماش لازم جرانين عشان ميجيرش خلاص لحد كده
شيلى فرش السراير والانتريه والكنب واغسليهم وبعدين افرشى السرير على مزاجك بقى يعنى دلعيه ملايه حلوة كده وعليها المفرش
رابعا:- امسحى الارضيات وحطى فى المايه اى منظف ليه ريحه عشان ينعش الارض ملهاش نفس يعنى
خامسا نفضى فرش الارضيه وافرشيه لما الارض تنشف خالص وبعدين بالمكنسة الكهربية وسريعا كده عليه بس
شوفتوا الحكاية سهله ازاى انا بعمل الشقه فى يوم بس انا ابنى حماده يساعدنى بيحلف ميخلينى ارتاح يوم انا اعمل وهو يبوظ كانك يابو زيد ما غزيت